ПРИКЛУЧИ СЕ НА КРУГОТ НА ПОДДРШКА
Индекс на телесна маса (BMI) калкулатор
<18.5 BMI опсег
потхранетост, недоволна тежина
18.5 – 24.9 BMI опсег
нормална идеална тежина
25 – 29.9 BMI опсег
прекумерна тежина
30 – 34.9 BMI опсег
дебелина класа 1
35 – 39.9 BMI опсег
дебелина класа 2
>40 BMI опсег
дебелина класа 3
Разбери го проблемот
Прекумерната тежина и дебелината не се само прашање на изглед. Тие претставуваат медицинска состојба која влијае врз секој дел од телото — од срцето и зглобовите до умот и емоциите.
Но, пред сè, дебелината не е прашање на волја или мрзливост. Тоа е комплексна комбинација на фактори: генетика, хормонален баланс, исхрана, физичка неактивност, стрес, нарушен сон и нарушено ментално здравје.
Во последните години бројот на лица со прекумерна тежина и дебелина расте, не само кај возрасните, туку и кај децата. Зад секој килограм плус секогаш „стои” нешто невидливо: анксиозност, хормонски нарушувања, неправилен начин на живот или едноставно недостиг на поддршка.
Но, наместо осуда, ни треба разбирање и разговор. Во изминатите две децении состојбата со дебелината кај популацијата во РС Македонија бележи раст.
Овие бројки не се само статистика, тука се сигнал за потреба од промени.
Гласноговорници во кампањата со кратка изјава
Габриела Јанческа
Дебелината не носи предизвици само додека си во таа состојба, последиците остануваат и потоа. Не е доволно само да ослабнеш. Јас ослабнав, но денес се соочувам со вишок кожа и со чувство дека бројката на вагата и одразот во огледалото не се совпаѓаат. Со дебелината не се „стекнав“, таа е дел од мојата генетика, со неа сум родена. Тоа не беше мој личен избор, туку нешто што ми е дадено. И затоа, и ден-денес, внимавам на секој залак и го бројам секој чекор во грижата за себе.
Проф. д-р Ирфан Ахмети
Дебелината претставува сериозна хронична болест која се карактеризира со многу компликации, дури и преку 220. Прекумерната тежина не е само надворешно наталожување на мастите, туку болест која треба навреме да се препознае и од страна на самото лице кое е обезно или надхрането, но и од страна на семејството, на семејните лекари и на сите други здравствени работници.
Тања Кочовска
Јас сум среќна. Кога ми се децата здрави, кога ми е внукот во прегратка, кога се смеам со луѓето што ги сакам, тоа е моето богатство. Да, имам дијабетес, имам вишок килограми, примам терапија и 14 килограми симнав, па застанав. Но тоа не ме дефинира. Не треба да плукате по човек кога ќе видите дека е дебел. Постои причина, постои приказна, постојат здравствени и животни околности што не ги знаете. Ако сакате да помогнете – помогнете. Ако не – немојте да се смеете.
Асс. д-р Билјана Тодорова
Прекумерната телесна тежина, односно дебелината, е призната како хронична болест од бројни меѓународни релевантни асоцијации и значајно го зголемува ризикот од кардиоваскуларни заболувања, дијабетес тип 2, метаболни нарушувања и одредени видови карциноми. Таа го скратува животниот век и сериозно го нарушува квалитетот на животот, влијаејќи и врз психичкото здравје преку појава на несоница, анксиозност и депресија. Дебелината има севкупно негативно влијание врз физичкото, психичкото и социјалното функционирање на лицата кои живеат со неа.
Лидија Кочовска
Живееме во средина каде што луѓето секогаш имаат коментар, без разлика дали си слаб, дебел или „таман“. Често повеќе се фокусираат на туѓиот двор отколку на сопствениот, дури и кога во нивниот владее хаос. Порано тоа многу ме погодуваше, особено затоа што од мали нозе сум дел од јавниот живот.
Павле Димковски
Пресвртот кај мене се случи кога дебелината почна да ми се одразува на здравјето: болки во нозете, вртоглавици и реален страв дека нешто сериозно може да се случи. Кога конечно застанав на вага по многу години и се соочив со бројката, тоа ми стана најсилен мотив да почнам со промена. Но сфатив дека ова е постојана борба, мотивацијата доаѓа и си оди, а создавањето здрави навики е процес со многу предизвици и препреки.
Ризици што може да ги предизвика прекумерната тежина (дебелина)
Дијабетес тип 2
Дебелината го зголемува ризикот од дијабетес тип 2 преку инсулинска резистенција, а намалувањето на тежината помага во контролата на нивото на шеќерот и спречување компликации.
Хипертензија
Дебелината го зголемува крвниот притисок и го оптоварува срцето, а умерено намалување на тежината го намалува ризикот од кардиоваскуларни проблеми.
Коронарна срцева болест
Дебелината го забрзува развојот на коронарната болест преку воспаление, нарушен липиден метаболизам и висок крвен притисок, зголемувајќи го ризикот од ангина пекторис и срцев удар.
Дислипидемија
Дебелината доведува до висок „лош” LDL холестерол, низок „добар” HDL холестерол и покачени триглицериди, а губењето на тежината го подобрува липидниот профил и го намалува ризикот од срцеви болести.
Опструктивна апнеја
при спиење (‘рчење)
Дебелината го зголемува ризикот и ги влошува симптомите на апнеата при спиење, а губењето на тежината ја ублажува и го подобрува квалитетот на спиењето.
Остеоартритис
Дебелината создава прекумерен притисок врз зглобовите и воспаление, зголемувајќи ја болката, а намалувањето на тежината ја ублажува болката и ја забавува прогресијата.
